ജറുസലേം .... പ്രവാചകന്മാരുടെ കാലടികള്‍ പതിഞ്ഞ മണ്ണ്. യഹൂദ ക്രൈസ്തവ ഇസ്ലാം മതങ്ങള്‍ പുണ്യമായി കരുതുന്ന മണ്ണ്. ദാവീദും ഗോലിയാത്തും ദ്വന്തയുദ്ധം നടത്തിയ മണ്ണ്. ക്രിസ്തുവിന്‍റെ ജനന മരണ ഉദ്ധാനങ്ങളാല്‍ പവിത്രമായ മണ്ണ്. മക്കയ്ക്ക് മുന്‍പ് മുസ്ലീങ്ങളുടെ പ്രാര്‍ത്ഥന ദിശയായ കിബലയായി പരിഗണിച്ചിരുന്നത് ജറുസലേമിലെ മസ്ജിദ് അല്‍ അഖ്സയായിരുന്നു. ഗബ്രിയേല്‍ മാലാഖ മുഹമ്മദ്‌ നബിയെ ബുറാഖ് എന്ന ചിറകുള്ള കുതിരയുടെ പുറത്ത് കയറ്റി സ്വര്‍ഗ്ഗത്തില്‍ കൊണ്ടുപോയതും ഇവിടെനിന്നാണ് എന്ന് മുസ്ലീങ്ങള്‍ വിശ്വസിക്കുന്നു. യഹൂദര്‍ മൂവായിരത്തോളം വര്‍ഷങ്ങളുടെ അവകാശമാണ് ജറുസലേമിനുമേല്‍ ഉന്നയിക്കുന്നത്. ചരിത്രത്തിന്‍റെ താളുകള്‍ പിന്നോട്ട് മറിക്കുമ്പോള്‍ മനസ്സിലാവും AD 70 നു മുന്‍പ് പലസ്തിന്‍ എന്നൊരു രാജ്യം ഉണ്ടായിരുന്നില്ല എന്ന്. മോശ ഈജിപ്തിൽ നിന്ന് ചെങ്കടല്‍ കടത്തി ഒപ്പം കൊണ്ടുവന്ന അബ്രഹാമിന്‍റെ സന്തതി പരമ്പരയെ പാര്‍പ്പിച്ച വാഗ്ദത്ത ഭൂമിയായിരുന്നു അത്. അവര്‍ ഇസ്രയേലിനെ തങ്ങളുടെ വാഗ്ദത്ത ഭൂമിയായി കരുതി നൂറ്റാണ്ടുകളോളം താമസിച്ചു പോന്നു. യൂദയായും സമരിയയും യഹൂദ ഗോത്രങ്ങള്‍ തിങ്ങിപാര്‍ത്തിരുന്ന സ്ഥലങ്ങള്‍ ആയിരുന്നു എന്നും ചരിത്രം പറയുന്നു. AD 70 ല്‍ റോമന്‍ ചക്രവര്‍ത്തിയായ ഹദ്രിയാന്‍റെ ആക്രമണത്തെ തുടര്‍ന്നാണ് ജൂതന്മാരുടെ ഇസ്രായേലില്‍ നിന്നുള്ള പലായനം ആരംഭിക്കുന്നത്. ഹദ്രിയാന്‍ ആ ഭൂവിഭാഗത്തെ ‘സിറിയ പലസ്തിന്‍’ എന്ന് നാമകരണം ചെയ്യുകയും ജൂതന്മാരെ അവിടെ നിന്ന് പുറന്തള്ളുകയും ചെയ്തു. ലോകത്തിന്‍റെ പല ഭാഗത്തേക്ക്‌ ചിതറപ്പെട്ട അവര്‍ നൂറ്റാണ്ടുകള്‍ക്കു ശേഷം പ്രവാസം അവസാനിപ്പിച്ചു തിരിച്ചു വരുവാന്‍ തുടങ്ങിയപ്പോള്‍ പാലസ്തീന്‍ തുര്‍ക്കിയിലെ ഒട്ടോമന്‍ സാമ്രാജ്യത്തിന്‍റെ ഭാഗമായിരുന്നു. അവിടത്തെ സുല്‍ത്താന്മാരില്‍ നിന്നും  അറബി ഭൂവുടമകളില്‍ നിന്നും ഭൂമി വാങ്ങിയാണ് യഹൂദര്‍ തിരിച്ചുവരവ് തുടങ്ങിയത്. കൈവശമാക്കിയ ഭൂമിയില്‍ കൃഷിയിറക്കിയും മറ്റും യഹൂദര്‍ മേഖലയില്‍ വാസമുറപ്പിച്ചു. 1918 ല്‍ ഒന്നാം ലോക മഹായുദ്ധത്തോടെ പലസ്തീന്‍ ഒട്ടോമന്‍ തുര്‍ക്കിയില്‍ നിന്നും ബ്രിട്ടന്‍റെ കൈവശമായി. 1937 ആയപ്പോഴേക്കും പലസ്തീനിലെ പകുതിയിലധികം ജനസംഖ്യ യഹൂദരുടെതായി. രണ്ടാം ലോകമഹായുദ്ധകാലത്ത് ഹിറ്റ്ലറുടെ പീഡനങ്ങളെതുടര്‍ന്ന് പാലായനം ചെയ്ത യഹൂദര്‍കൂടി ഇവിടെയെത്തി. അങ്ങനെ 1948' ൽ ഐക്യരാഷ്ട്ര സംഘടനയുടെയും ബ്രിട്ടന്‍റെയും സഹായത്തോടെ പാലസ്തീന്‍ വിഭജിച്ച്‌ ഇസ്രയേൽ നിലവിൽ വരികയും ചെയ്തു. ഇതോടെ ഇസ്ലാം ഉണ്ടാകുന്നതിനു മുന്നേ യഹൂദര്‍ ജീവിച്ച മണ്ണില്‍ ജൂത-ഇസ്ലാം സംഘര്‍ഷങ്ങള്‍ക്ക് തുടക്കമായി. തുടര്‍ന്ന് വിശാല ജൂതരാഷ്ട്രവും സോളമന്‍ ദേവാലയവും എന്ന ലക്ഷ്യത്തോടെയുള്ള ഇസ്രായേലിന്‍റെ അധിനിവേശത്തില്‍ നിന്നും പാലസ്തീനെ മോചിപ്പിച്ചു പൂര്‍വ്വ സ്ഥിതിയില്‍ എത്തിക്കുക എന്ന ലക്ഷ്യത്തോടെയാണ് 1987' ല്‍ ഹമാസ് ഔദ്യോഗികമായി രൂപംകൊണ്ടത്. P L O സ്ഥാപകനായ യാസര്‍ അറാഫത്തിന്‍റെ നിര്യാണത്തോടെ മുഖ്യധാര രാഷ്ട്രീയത്തിലുണ്ടായ നേതാവിന്‍റെ അഭാവത്തില്‍ ഹമാസ് രാഷ്ട്രീയത്തില്‍ പ്രവേശിക്കുകയും 2006 ല്‍ നടന്ന തിരഞ്ഞെടുപ്പില്‍ ഒറ്റയ്ക്ക് ഭൂരിപക്ഷം നേടി അധികാരത്തിലെത്തുകയും ചെയ്തു.
സ്ത്രീകളെയും കുട്ടികളെയും മുന്നില്‍ നിര്‍ത്തി ജനവാസ മേഖലയില്‍ നിന്ന് ഇസ്രായേലിലേക്ക് ആക്രമണം നടത്തുകയും, സംരക്ഷിക്കേണ്ട കുട്ടികളുടെ കയ്യില്‍ കരിങ്കല്ല് കൊടുത്തുവിട്ടു പട്ടാളത്തെ പ്രകൊപിപിക്കുകയും ചെയ്യുന്നു എന്നും, തിരിച്ചു പ്രധിരോധിക്കുബോള്‍ ഉണ്ടാകുന്ന ആള്‍നാശത്തിലൂടെ സിവിലിയന്മാര്‍ കൊല്ലപ്പെടുബോള്‍ ലോകരാഷ്ട്രങ്ങളുടെ സഹതാപം പിടിച്ചുപറ്റി കോടിക്കണക്കിനു വിദേശനാണ്യം സംഭാവനയിലൂടെ റംസാൻ മാസത്തിൽ നേടുന്നു എന്നതുമാണ് ഹമാസ് നേരിടുന്ന വിമര്‍ശനങ്ങള്‍. ലോകം മുഴുവന്‍ ജിഹാദിന്‍റെ പേരില്‍ ബോംബു സ്ഫോടനം നടത്തുന്നവര്‍ക്ക് എന്തുകൊണ്ട് ഇസ്രായേലിനുള്ളില്‍ കടന്ന് ഒരു പടക്കം പോലും പൊട്ടിക്കുവാന്‍ കഴിയുന്നില്ല എന്നും വിമര്‍ശിക്കുന്നവര്‍ ചോദിക്കുന്നു. ചുറ്റുപാടും ശത്രുക്കളാല്‍ വലയം ചെയ്യപ്പെട്ട ഒരു ചെറിയ രാജ്യമായിട്ടുകൂടി ശാസ്ത്ര, സാങ്കേതിക, രാജ്യസുരക്ഷ മേഖലകളിലെ ഇസ്രായേലിന്‍റെ നേതൃത്വം ആര്‍ക്കും നിഷേധിക്കുവാന്‍ കഴിയില്ല എന്നത് ശരിതന്നെ. ഹിറ്റ്‌ലര്‍ അവശേഷിപ്പിച്ച യഹൂദരില്‍ നിന്നാണ് ലോകത്തിന് മികച്ച സംഭാവനകള്‍ പലതും  സമ്മാനിച്ച ശാസ്ത്രജ്ഞന്‍ പലരും ജനിച്ചത്‌. മതത്തിന്‍റെ പേരില്‍ വേര്‍പെട്ടു രാജ്യമുണ്ടാക്കിയ പാക്കിസ്ഥാന്‍റെ പല കടന്നുകയറ്റങ്ങളിലും ഇന്ത്യക്ക് പിന്തുണ നല്‍കിയത് റഷ്യയും ഇസ്രായേലുമാണ്. രാഷ്ട്രീയ സ്ഥിരതയോ സമാധാനമോ ഇല്ലാത്ത പാക്കിസ്ഥാനില്‍ ബോംബു സ്ഫോടനങ്ങള്‍ അധികവും ഉണ്ടാകുന്നത് മോസ്കുകള്‍ക്കുള്ളിലാണ്. ഇറാക്കിലും സിറിയയിലും ഷിയ-സുന്നി സഹോദരന്മാര്‍ പരസ്പരം കൊണ്ടും കൊടുത്തും മരിച്ചു വീഴുമ്പോള്‍, അത് കണ്ടില്ലെന്നു നടിച്ചു രാഷ്ട്രീയവും ഫുട്ബോളും ചര്‍ച്ചചെയ്തവര്‍ അവിടെ മരിച്ചു വീഴുന്ന കുരുന്നുകള്‍ക്ക് വേണ്ടി കണ്ണീരോഴുക്കുകയോ ഫോട്ടോഷോപ്പില്‍ അടയിരുന്നു ഫോട്ടോകള്‍ പടച്ചുവിടുകയോ ചെയ്തില്ല. ഇറാഖിലും സിറിയയിലും തമ്മില്‍ തല്ലി തലയറുത്ത് ഫുട്ബോളാക്കിയ നരനായാട്ടിനെ ന്യായീകരിക്കുകയും ഇസ്രായേലിന്‍റെ പ്രതിരോധത്തെ വിമര്‍ശിക്കുകയും ചെയ്യുന്നതിലെ ഇരട്ടത്താപ്പ് വര്‍ഗ്ഗീയത തന്നെയാണ്. നൈജീരിയയില്‍ സ്കൂള്‍ വിധ്യാര്‍ഥിനികളെ തട്ടികൊണ്ടുപോയി നിര്‍ബന്ധമായി മതം മാറ്റിയപ്പോളും, സ്വന്ത സഹോദരന്‍റെ തലയറുത്ത് ജീവനെടുക്കുംബോഴും തോക്കുയര്‍ത്തി അള്ളാഹു അക്ബര്‍ എന്ന് വിളിക്കുന്ന ഈ ഭോഷന്മാരുടെ ഈ വിളികള്‍ കേട്ടു സന്തോഷിക്കുന്നവനാണോ യദാര്‍ത്ഥ ദൈവം. അവിശ്വാസിയുടെ മൃതദേഹത്തിനോടുപോലും ബഹുമാനം കാണിച്ച വ്യക്തിയായിരുന്നു പ്രവാചകന്‍. മാനവികതയെ സംരക്ഷിക്കാന്‍ ജൂതനും മുസല്‍മാനും ബാധ്യസ്ഥനാണ്. ഹമാസ് വെടി നിര്‍ത്തിയാല്‍ തീരുന്ന പ്രശ്നങ്ങള്‍ മാത്രമേ ഇപ്പോള്‍ നിലവിലുള്ളൂ. അതിനു അവരെ പ്രാപ്തരാക്കേണ്ടത് അവര്‍ക്ക് ആയുധവും പണവും നല്‍കുന്ന അറബ് ലീഗ് രാജ്യങ്ങള്‍ തന്നെ. ദിവസേന ആയിരക്കണക്കിന് ആളുകള്‍ ഒരുനേരത്തെ വയറു നിറയ്ക്കാന്‍ ബുദ്ധിമുട്ടുന്ന പാലസ്തീന്‍ ഉള്‍പ്പടെയുള്ള ദരിദ്ര ഇസ്ലാമിക രാജ്യങ്ങളുടെ പട്ടിണിമാറ്റുവാന്‍ സമ്പന്നരായ അറബ് ലീഗ് രാജ്യങ്ങള്‍ പാഴാക്കി കളയുന്ന ഭക്ഷണം മാത്രം മതിയാവും.
യേശുവിനെ ഇപ്പോഴും കള്ള പ്രവാചകനായി കാണുന്ന യഹൂദരുമായി വിശ്വാസ പ്രമാണങ്ങളില്‍ വൈരുധ്യമുണ്ടെങ്കിലും, ഇസ്രയേല്‍ ദൈവത്തിനു വിശുദ്ധവും, വിളവിന്‍റെ ആദ്യ ഫലവുമാകുന്നു എന്ന് ഓരോ ക്രിസ്ത്യാനിയും വിശ്വസിക്കുന്നു. അതുകൊണ്ടുതന്നെയാണ്, ക്രിസ്തുവിനെ അന്ഗീകരിക്കാത്ത യഹൂദരുടെ അനുഭാവികളായി പലരും ക്രിസ്ത്യാനികളെ തെറ്റിദ്ധരിക്കുന്നതും. മോശ പ്രവചിച്ച മിശിഹയെ യഹൂദര്‍ പ്രതീക്ഷിച്ചിരുന്നു. എന്നാല്‍ ക്രിസ്തു രാജകൊട്ടാരത്തില്‍ ജനിക്കാതിരുന്നതും, ദൈവപുത്രന്‍ എന്ന് അവകാശപ്പെട്ടതും, ശാബത്ത് നാളില്‍ അത്ഭുതങ്ങള്‍ പ്രവര്‍ത്തിച്ചതും, ജറുസലേം ദേവാലയം പുനര്‍നിര്‍മ്മിക്കാന്‍ കഴിയാതിരുന്നതുമൊക്കെയാണ് അവരെ ക്രിസ്തുവിന് എതിരാക്കിയത്‌. "മൂലക്കല്ലിനെ" ഉപയോഗ ശൂന്യമായ കല്ലിനെപ്പോലെ അവര്‍  വലിച്ചെറിഞ്ഞു. കാത്തിരുന്ന മിശിഹയെ തിരിച്ചറിയാന്‍ കഴിയാതിരുന്നതാണ് ഇസ്രയേല്‍ ജനം ഇന്നനുഭവിക്കുന്ന കൂനിന്മേല്‍ കുരുപോലുള്ള രക്തരൂക്ഷിതമായ ചെറുത്തുനില്‍പ്പുകളുടെ കാരണം. തന്നെ ക്രൂശിക്കുവാനായി കൊണ്ടുപോകുമ്പോള്‍ കരഞ്ഞുകൊണ്ട്‌ അനുഗമിച്ച സ്ത്രീകളെ നോക്കി ക്രിസ്തു പറഞ്ഞു. ജറുസലേം പുത്രിമാരെ എന്നെചൊല്ലി കരയേണ്ട, നിങ്ങളുടെ മക്കളെ ചൊല്ലി കരയുക. മച്ചികളും പ്രസവിക്കാത്ത ഉദരങ്ങളും കുടിപ്പിക്കാത്ത മുലകളും ഭാഗ്യമുള്ളവ എന്ന് പറയുന്ന കാലം വരുന്നു. ആ കാലം അടുത്തെത്തിയിരിക്കുന്നു. കാരണം, യഹൂദര്‍ ഇപ്പോഴും പ്രതീക്ഷിച്ചിരിക്കുന്ന മിശിഹായുടെ സ്ഥാനത്തേക്ക് അവരെ കബളിപ്പിച്ചുകൊണ്ട് ക്രൂരനായ അന്തിക്രിസ്തു എന്ന ദജ്ജാല്‍ അവരോധിക്കപ്പെടും. യഹൂദരുമായി ഏഴു വര്‍ഷത്തെ ഉടമ്പടി ഉണ്ടാക്കി യരുശലേം ദേവാലയം പണിഞ്ഞ് അതിനുള്ളില്‍ തന്‍റെ പ്രതിമ സ്ഥാപിച്ചു കുമ്പിട്ട്‌ ആരാധിക്കുവാന്‍ കല്‍പ്പിക്കുമ്പോള്‍ മാത്രമാകും അവര്‍ തങ്ങളുടെ യദാര്‍ത്ഥ മിശിഹയായ ക്രിസ്തുവിനെ തിരിച്ചറിയുക. അന്തിക്രിസ്തുവിന്‍റെ മഹാപീഡനത്തിലൂടെ കടന്നുപോകുമ്പോള്‍ തങ്ങളുടെ പൂര്‍വീകര്‍ സൃഷ്ടിച്ച തിരുമുറിവുകളിലേക്ക് നോക്കുകയും രക്ഷിക്കപ്പെടുകയും ചെയ്യും. ദൈവം അവരുടെ അവിശ്വാസവും മാലിന്യവും കഴുകിക്കളയുമ്പോള്‍ അവര്‍ക്ക്‌ ആത്മീയ നവോത്ഥാനം ഉണ്ടാവുകയും അവര്‍ വീണ്ടും ജനിക്കുകയും ചെയ്യും. കല്ലായുള്ള ഹൃദയം നീക്കി മാംസമായുള്ള ഹൃദയം നിങ്ങള്‍ക്കു തരും. ഞാന്‍ എന്‍റെ ആത്മാവിനെ നിങ്ങളുടെ ഉള്ളില്‍ ആക്കി നിങ്ങളെ എന്‍റെ ചട്ടങ്ങളില്‍ നടക്കുമാറാക്കും. നിങ്ങള്‍ എന്‍റെ വിധികളെ പ്രമാണിച്ചു അനുഷ്ഠിക്കും. ഞാന്‍ നിങ്ങളുടെ പിതാക്കന്മാര്‍ക്കു കൊടുത്ത ദേശത്തു നിങ്ങള്‍ പാര്‍ക്കും. നിങ്ങള്‍ എനിക്കു ജനമായും ഞാന്‍ നിങ്ങള്‍ക്കു ദൈവമായും ഇരിക്കും. ഇങ്ങനെ യഹോവയായ ദൈവം ഇസ്രായേലിനോട് പുതിയനിയമം ചെയ്യും. അയല്‍ക്കാരനെ തന്നെ പോലെ സ്നേഹിക്കുവാന്‍ പഠിപ്പിച്ച  ക്രിസ്തുവിന്‍റെ ക്ഷമയും സഹനവും ജീവിതത്തില്‍ പകര്‍ത്തുവാന്‍ കഴിയുന്ന ഒരു സമൂഹത്തിന് രാജ്യദ്രോഹികളും തീവ്രവാദികളുമാകാന്‍ കഴിയില്ല. സത്യ നിഷേധികള്‍ക്കെതിരെ യുദ്ധം ചെയ്യുവാനോ അവരെ ശത്രുക്കളായി കാണുവാനോ ബൈബിള്‍ ഉദ്ഘോഷിക്കുന്നില്ല. നിരപരാധികളുടെ ചോര വീഴ്ത്തുന്ന തീവ്രവാദവും സാമ്രാജ്യത്തവാദങ്ങളും ഇനി എന്നാണ് അവസാനിക്കുക്ക. ഏതൊരു യുദ്ധവും കൂട്ടക്കൊലയും സങ്കടകരമാണ്. ഇറാക്കിലെ സുന്നികളും ഷിയാക്കളും പരസ്പരം വെട്ടിമരിക്കുന്നതും, കാശ്മീരില്‍ ഇസ്ലാമിക തീവ്രവാദികളാല്‍ പണ്ഡിറ്റുകള്‍ വധിക്കപ്പെടുന്നതും, സിറിയയില്‍ ക്രിസ്ത്യാനികള്‍ നാമാവശേഷപ്പെടുന്നതും, പാക്കിസ്ഥാനില്‍ ഹിന്ദുക്കള്‍ പീഡിപ്പിക്കപ്പെടുന്നതും, ഇസ്രായേല്‍ ഗാസയിലെ പുതു തലമുറയെ കൊന്നൊടുക്കുന്നതും കാണുമ്പോള്‍ മനുഷത്യമുള്ളവര്‍ക്ക് ഒരേ വികാരമാണ് ഉണ്ടാവുക.
                    
പിതാവായ ദൈവത്തിന്‍റെ സൃഷ്ടിയാണ് എല്ലാവരും. ദൈവീക നിയമങ്ങള്‍ ലംഘിച്ചതിനാല്‍ പ്രവചകന്മാരാലും ദൈവത്താലും തന്നെ ശപിക്കപ്പെട്ട യഹൂദരെ വാഗ്ദത്ത ഭൂമിയിലേക്ക് വീണ്ടും ഒരുമിച്ചുകൂട്ടി അവരുടെ അന്ധത ബാധിച്ച കണ്ണുകളില്‍ തുപ്പല്‍ പുരട്ടിയ ചേറുതേച്ചു സൌഖ്യമാക്കി വെളിച്ചത്തിലേക്ക് നയിക്കേണ്ടത് ദൈവ നിവേശിതമാണ്. ഗാസയിലും വെസ്റ്റ്‌ ബാങ്കിലുമായി രണ്ടായി ചിന്ന ഭിന്നമാക്കപ്പെട്ട രാഷ്ട്ര സങ്കല്‍പ്പവുമായി ലോകമനസാക്ഷിക്കു മുന്നില്‍ ചോദ്യ ചിഹ്നമായ പാലസ്തീന്‍ ജനതയ്ക്ക് നിലനില്‍പ്പും സമാധാനവും അത്യന്താപേക്ഷിതമാണ്. അതിന് തീവ്രവാദവും ജിഹാദും ഉപേക്ഷിക്കാന്‍ ഹമാസ് തയ്യാറാവണം. ഒരു ഗാന്ധി ഇസ്രായേലിലോ പാലസ്തീനിലോ ഉണ്ടായിരുന്നെങ്കില്‍ ഇന്നത്തെ അവസ്ഥ ഉണ്ടാകുമായിരുന്നില്ല. ബാബറി മസ്ജിദ്-രാമജന്മഭൂമി തര്‍ക്കം പോലെ സങ്കീര്‍ണ്ണമാണ് ഇസ്രയേല്‍-പാലസ്തീന്‍ പ്രശ്നവും. മുസ്ലിം ആരാധനാലയമായ മസ്ജിദ് അല്‍ അഖ്സയ്ക്ക് കീഴില്‍ സോളമന്‍റെ പള്ളിയുടെ അവശിഷ്ടങ്ങള്‍ ഉണ്ടെന്ന് യഹൂദര്‍ വിശ്വസിക്കുന്നു. അതേപോലെ അവിടെനിന്നാണ് മുഹമ്മദ്‌ നബി സ്വര്‍ഗ്ഗത്തില്‍ പോയി തിരിചെത്തിയതെന്നു മുസ്ലീങ്ങളും വിശ്വസിക്കുന്നു. അതുകൊണ്ടുതന്നെ ഏതെങ്കിലുമൊരു രാഷ്ട്രതലവന് ശാശ്വതമായി പരിഹരിക്കാവുന്നതല്ല ഇത്. ഇരുകൂട്ടരുടെയും ലോലമായ മതവികാരങ്ങള്‍ വൃണപ്പെടാതെയുള്ള പരസ്പര സമവായത്തിനു മാത്രമേ ഈ മേഖലയില്‍ ശാശ്വതമായി സമാധാനം കൊണ്ടുവരുവാന്‍ സാധിക്കുകയുള്ളൂ. അതിനു കഴിഞ്ഞില്ലെങ്കില്‍ ഹദീസുകള്‍ പ്രവചിക്കുന്നതുപോലെ "ദജ്ജാലും-ഇമാംമഹ്ദിയും-ഈസനബിയും", ബൈബിള്‍ പ്രവചിക്കുന്നപോലെ "അന്തിക്രിസ്തുവും-കള്ളപ്രവാചകനും -യേശുക്രിസ്തുവും" വരുന്നതുവരെ കാത്തിരിക്കേണം. എന്നായാലും ഒരിക്കല്‍ പുതിയ യരുശലേം എന്ന വിശുദ്ധ നഗരം മണവാട്ടിയെപ്പോലെ ഒരുങ്ങി സ്വര്‍ഗ്ഗത്തില്‍ നിന്നും ഇറങ്ങിവരും. അതുവരെ മക്കളെയോര്‍ത്തു കരയുന്ന ഇസ്രയേല്‍-പലസ്തീന്‍ അമ്മമാരുടെ കണ്ണുകളില്‍  കണ്ണുനീര്‍ അവശേഷിക്കുമോ ?.
                                                                                                                            
                                                                                          
                                                                                          https://www.facebook.com/sureshjoseph2009




 
 
 
 
0

Add a comment

Loading